10:53 ص
المقهى الأدبي وجدة
اطْياف النور
أحمد اليعقوبي
يا ربي مولايْ يا مْيسّرْ لعْلوم
يسَّرْ هاذ الڭولْ وارْفعْ م لّمْقام
نحْكي عْلى ما ريتْ في هذاك النّوم
وانا فايقْ نايمْ ما نحْكَمْ ف نْيام
هاوْ اطْياف النّورْ جاتْني ذاك اليوم
فْ ليلة الحُمّان شْحالْ هاذي منْ عام
شيخْهُم تْقدّم رْعدْت انا محْموم
اتْبسّمْ وُڭالْ برْد عْليكْ وسْلام
اسْمعْني يا ذا لِياهْ راكْ مضْيوم
وُمالكْ مڭْلوبْ اطْلعْ رافَڭْ لحْمام
انْتَ حُرّي وِيّاكْ قادَرْ علْ لهْموم
ربي يْفاجيها وتتْبدّلْ لِيّام
لا طّاوَعْ نفْسكْ لا تضْحى مهْزوم
اسْتنْصحْ واسْتفْصلْ دِرْ عقْلكْ علاّم
اتْڭعّدْ كُن شْجيعْ لا تسْقُطْ معْدوم
خُذْ مْ رايْ لُقْدام اجْدادكْ لُكْرام
بينْ عينيك الله ل اليُوم المعْلوم
ويّاكْ اكْ ڭلْبكْ ايمانْ عامرْ بَالتَّمام
قصْدكْ جاه العَزّ تْحزّمْ يا مغْروم
عانقْ ضَي الحُبْ لا تلْبسْ تخْمام
اغْطسْ في بحر النّورْ رُوحْ طِرْ وعُوم
اصْبرْ وُكابَرْ لا تسْمعْ لعْوام
محْضي بَالنية اطْلڭْ طيركْ يِحُوم
يا ولْد باب الله اتْخطَّ لَلْڭُدّام
نور الله يِفيضْ يا ذاك المكْلوم
يا عاشَق النّورْ شُوف وْسَعْ لَنام
اشْعلْ ولوْ شمْعة والله حيْ قيُّوم
ها وْخيرْ لَكْ وُما تلْعن الظَّلام
اتْوڭّض اتْڭعّدْ.. وُجَهْدكْ ملْموم
احْذر العدْيانْ ولوْ كانوا نِيام
عَنْدَك الڭلْبة الشّاري يْجي محْموم
واحْذَر الدّلاّلْ عشّابْ وُلحّام
يِعزّوك اليُومْ وُغدّا مذْمومْ
يِردّوك ضْبعْ وانْتَ كَـ الضّرْغام
أتْباع الملْعونْ مخْيطْهُمْ مسْموم
كْلامْهُمْ محْبوكْ موْزونْ بْ لڭْرام
المنْطوق عْسُولْ وُلخْدعْ مرْسوم
سوق الدّلاّلة فيهْ يحْلا لكْلام
عنْدكْ يِغرّوكْ ويردّوكْ سلّومْ
تتْهرّسْ وشْكونْ يِجبّرْ لعْظام
ها وذْني منّك خْطيك مْ هاذ القوم
توْساد النّسْيانْ ما يفْجي لغْيام
وصاطْ ريح خْفيفْ.. صَبْت راسي مقْيوم
لَڭْرينة ف سْماها وانا نرْسم لنْظام
أحمد اليعقوبي يخْتمْ ذا المنْظوم
وما كاينْ ما خِير مْ حمْد الله خْتام
-----
أحمداليعقوبي
د. رياح النور 2012
