مختارات من زجل الحسن درويش

 

مختارات من زجل الحسن درويش

 

 

مَن تْرَابْها تْرَاب والْمَعْنى وَاقْفة
واللّي فْهَمَتْها قْلِيلة بَالْمَنْغاز مْوَالْفة
والّلي لْسَانْها سَبَّاق بَالْكَذْبة حَالْفة
هِيّ مَن ورَاها واللّي ڭدَّامْها مَا شَايْفة
وَاشْ بْغات تْـڭُول فِيك إِلاَ كَانت تَالْفة ...
ومَن وجَهها الْقَلب يَرْجَف والْكَبْدة خَايْفة
 
أبركان 2014/10/19

_____________

مَن حْلِيبْها مَاشْبَع الرْضِيع
ولا أمَانة رْعَوْها لا تْضِيع
وارْضْها صَلْبة ولا رْبِيع
وكُلْها مَنْ دَمْها يَشْري ويْبِيع
فِين حَقْنا مَن حَقْنا فِيها جْمِيع ...
وهِيّ وثِيقة مْوَقْعة بْلا تَوْقِيع
 
أبركان 2014/10/18

_______________

لاتَغْطَس بْعِيبَك فْ دَمَّك يا إِنْسان
الْكَلْمة تَشْعل ومَن دْموعْها سُلْطَان
حُبَّك يَرْوي والَبْحر مَن مَلْحُه عَطْشان
وِيلا الْوَقت بَالصَّمْت حَرْكَت لْسَان
خْيولْها جَفْلَت ولا كَانوا بَعْدها فُرْسان ...
ومَابْقى غِيرْها فْ هَاذْ الزْمان

أبركان 201/10/17

_________________

الْمَجدوب مَن حْوَالُه شَلَّى كْلام
ومَن حَرُوفُه تَنْزَف مَن شَلَّى اقْلام
قَنْدِيلْها مَنْها رَوَّام وسْط ظْلام
وهِيّ فَايْقة ومَن نَاسْها نَيَّام
واللِّي قْلَبْ عْطى ظَهْرُه الَّوْشام...
وفِين زِينَتْها مْع زِينَت الايَّام

أبركان 2014/10/16

______________________

يَاشَّايَف حَرْفَك وحَرْفَك مَا يْشُوف
لا تَسْتَنْكَر بَلْسَانك وقَلْبَك مَلْهُوف
ظَلْ مَن خْيَالَك يَزْرَع فِيك الْخُوف
ومَن وهْمَك لاَ تْبَالَغ ومَنْها مَعْروف
وسَّعْ النَّظْرة ومَن ورَاها مَكْشُوف ...
ولاَ تْمَزَّق الْكَلْمة مَا بِين الَحْروف 

أبركان 2014/10/15